मतदारांना घरपोच निवडणूक पत्रिका मिळणार - जिल्हाधिकारी

बुलडाणा : मतदारांनी अधिकाअधिक प्रमाणात मतदान करावे आणि मतदानाची टक्केवारी वाढावी यासाठी जिल्ह्यात प्रत्येक मतदारापर्यंत पोहोचून निवडणूक पत्रिका वाटण्यात येणार आहेत, अशी माहिती जिल्हाधिकारी तथा जिल्हा निवडणूक निर्णय अधिकारी किरण कुरुंदकर यांनी दिली. भारत निवडणूक आयोगातर्फे मतदार जागृतीचा कार्यक्रम आयोजित करण्यात आला आहे. याबाबत विभागीय आयुक्त डी. आर. बनसोड यांनी घेतलेल्या आढावा बैठकीत श्री. कुरुंदकर बोलत होते. जिल्ह्यात 15 लाख 86 हजार 192 निवडणूक पत्रिका (पोलचिटस्) छापून घेण्यात आल्या आहेत. या पोलचिटस् बिएलओ अर्थात बुथ लेव्हल ऑफिसर यांना देण्यात आल्या असून हे बिएलओ येत्या चार दिवसात घरोघरी भेट देऊन मतदारांना पोहोचविणार आहेत. जिल्ह्यात अधिकाअधिक मतदारांपर्यंत पोहोचण्याचा एक प्रयत्न म्हणून जिल्हाधिकारी या नात्याने नागरिकांना एक पत्र लिहिले व लेटरहेडवरील या पत्राच्या 1 लाख 5 हजार प्रती वृत्तपत्र विक्रेता संघटनेच्या माध्यमातून घराघरात पोहोचल्या आहेत, अशीही माहिती त्यांनी यावेळी दिली.